ಕುಂದಾಪುರ: ತುಸು ವಿರಾಮ ನೀಡಿದ ಮಳೆ

ಕುಂದಾಪುರ, ಜು.9: ಕಳೆದ ಒಂದು ವಾರದಿಂದ ಎಡೆಬಿಡದೆ ಸುರಿಯುತ್ತಿರುವ ಮಳೆ ಮಂಗಳವಾರ ಬೆಳಿಗ್ಗೆಯಿಂದ ತುಸು ವಿರಾಮ ನೀಡಿದೆ. ಮೋಡಗಳ ಮರೆಯಿಂದ ಬಿಸಿಲ ಎಳೆಗಳು ಕಾಣಿಸುತ್ತಿದೆ.

ಕಳೆದ ಬುಧವಾರದಿಂದ ನಿರಂತರವಾಗಿ ಮಳೆ ಸುರಿಯುತ್ತಲೇ ಇತ್ತು. ಕಪ್ಪಡರಿದ ಮೋಡಗಳಿಂದ ಬಿಸಿಲನ್ನೇ ಕಾಣದ ವಾತಾವರಣ ಸೃಷ್ಟಿಯಾಗಿತ್ತು. ವ್ಯಾಪಕ ಮಳೆಯಿಂದ ಜನಜೀವನ ಸಮಸ್ಯೆಗೆ ಸಿಲುಕಿತ್ತು. ನೆರೆಯೂ ಕೂಡಾ ಕಾಣಿಸಿಕೊಂಡಿತ್ತು. ಮಳೆ ನಕ್ಷತ್ರದ ಪ್ರಕಾರ ಶುಕ್ರವಾರ ಪ್ರಾರಂಭಗೊಂಡ ಪುನರ್ವಸು ಮಳೆ ಆರ್ಭಟಿಸುತ್ತಲೇ ಆರಂಭ ಮುಂದುವರಿಸಿತ್ತು.

ಸೋಮವಾರ ಕರಾವಳಿಯಲ್ಲಿ ರೆಡ್ ಆಲರ್ಟ್ ಘೋಷಣೆ ಮಾಡಲಾಗಿತ್ತು. ಮುಂಜಾಗೃತ ಕ್ರಮವಾಗಿ ಮಂಗಳವಾರ ಶಾಲಾ ಪದವಿಪೂರ್ವ ಕಾಲೇಜುಗಳಿಗೆ ರಜೆ ನೀಡಲಾಗಿತ್ತು.