ಮಕ್ಕಳ ಹಕ್ಕುಗಳ ಹೋರಾಟಗಾರ, ಹಕ್ಕೋತ್ತಾಯ ಆಂದೋಲನದ ಪ್ರಮುಖ ನಮ್ಮ ಭೂಮಿಯ ದಾಮೋದರ ಆಚಾರ್ಯ ಇನ್ನಿಲ್ಲ

ಕುಂದಾಪುರ, ನ.25: ಕರ್ನಾಟಕ ರಾಜ್ಯ ಪಂಚಾಯತ್ ರಾಜ್ ಹಕ್ಕೋತ್ತಾಯ ಆಂದೋಲನದ ಪ್ರಮುಖರಾಗಿ, ಮಕ್ಕಳ ಹಕ್ಕುಗಳ ಹೋರಾಟಗಾರರಾಗಿ ಸಾಮಾಜಿಕ ಕಾರ್ಯಗಳಲ್ಲಿ ತನ್ನನ್ನು ತೊಡಗಿಸಿಕೊಂಡಿದ್ದ ‘ನಮ್ಮ ಭೂಮಿ’ಯ ಬಿ.ದಾಮೋದರ ಆಚಾರ್ಯ (63ವ) ಅಲ್ಪಕಾಲದ ಅಸೌಖ್ಯದಿಂದ ನವಂಬರ್ 25ರಂದು ನಿಧನರಾದರು.

ಮೂಲತಃ ಕುಂದಾಪುರ ತಾಲೂಕಿನ ಬಸ್ರೂರು ಗ್ರಾಮದವರಾದ ಅವರು ಪದವಿ ಶಿಕ್ಷಣವನ್ನು ಮುಗಿಸಿ ಬೆಂಗಳೂರಿನಲ್ಲಿ ಸಾಮಾಜಿಕ ಚಳವಳಿಯಲ್ಲಿ ತನ್ನನ್ನು ತೊಡಗಿಸಿಕೊಂಡರು. ಬೆಂಗಳೂರಿನಲ್ಲಿ ಸಿಡಬ್ಲ್ಯೂಸಿ ಸಂಸ್ಥೆಯನ್ನು ಆರಂಭಿಸುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸಿ ಮಕ್ಕಳ ಹಕ್ಕುಗಳು, ಬಾಲಕಾರ್ಮಿಕರ ಬಗ್ಗೆ ಕಾರ್ಯವನ್ನು ನಿರ್ವಹಿಸಿದರು. ದಿ ಕನ್ವರ್ನ್ಡಫಾರ್ ವರ್ಕಿಂಗ್ ಚಿಲ್ಡ್ರನ್ ಸಂಸ್ಥೆಯ ಕಾರ್ಯಕಾರಿ ನಿರ್ದೇಶಕರಾಗಿ ಸೇವೆಯನ್ನು ಸಲ್ಲಿಸಿದ್ದಾರೆ.

ಬಸ್ರೂರಿನ ರಾಮದಾಸ್ ಆಚಾರ್ಯ ಮತ್ತು ಪ್ರೇಮಲತಾ ಆಚಾರ್ಯ ದಂಪತಿಗಳ ಪುತ್ರರಾಗಿರುವ ದಾಮೋದರ ಆಚಾರ್ಯರು ಪತ್ನಿ, ಇಬ್ಬರು ಪುತ್ರರನ್ನು ಅಗಲಿದ್ದಾರೆ.