ನಕಲಿ ಪರಶುರಾಮ : ನ್ಯಾಯವು ಮೇಲುಗೈ ಸಾಧಿಸುತ್ತದೆ | ಹೈಕೋರ್ಟ್‌ನಲ್ಲಿ ಪಿಐಎಲ್ ದಾಖಲಿಸಲು ಮುಂದಾದ ಸಮಾನ ಮನಸ್ಕರ ತಂಡ

ಜನಪ್ರತಿನಿಧಿ (ಕಾರ್ಕಳ) : ಭಗವಾನ್ ಪರಶುರಾಮನಿಗೆ ನ್ಯಾಯ ಒದಗಿಸಲು ಈ ಹೋರಾಟದಲ್ಲಿ ನಾವು ತೆಗೆದುಕೊಂಡ ಪ್ರತಿಯೊಂದು ಹೆಜ್ಜೆಯ ಬಗ್ಗೆಯೂ ನಾವು ಸ್ಪಷ್ಟವಾಗಿದ್ದೇವೆ. ಇದು ಎಂದಿಗೂ ಯಾವುದೇ ರಾಜಕೀಯ ಪಕ್ಷದ ವಿರುದ್ಧದ ಹೋರಾಟವಲ್ಲ ಆದರೆ ಪರಶುರಾಮನನ್ನು ತನ್ನ ಲಾಭಕ್ಕಾಗಿ ಬಳಸಿಕೊಂಡ ವ್ಯಕ್ತಿ, ತನ್ನ ವೈಯಕ್ತಿಕ ಲಾಭಕ್ಕಾಗಿ ಹಿಂದೂಗಳ ಭಾವನೆಗಳೊಂದಿಗೆ ಆಟವಾಡುವ ವ್ಯಕ್ತಿಯ ವಿರುದ್ಧ ಎಂದು ಪರಶುರಾಮ ಥೀಂ ಪಾರ್ಕ್‌ನಲ್ಲಿ ನಡೆದಿರುವ ಅವ್ಯವಹಾರವನ್ನು ಬಯಲಿಗೆಳೆದ ಸಮಾನ ಮನಸ್ಕರ ತಂಡ ಪ್ರಕಟಣೆಯಲ್ಲಿ ಹೇಳಿದೆ.

ಸ್ಥಳೀಯ ಕಾಂಗ್ರೆಸ್ ನಾಯಕರು ಹೋರಾಟ ನಡೆಸಿದ್ದರೂ ಕೂಡ ಒಂದು ವರ್ಷ ಸುಮ್ಮನಿದ್ದ ಪ್ರಮುಖರು ಈಗ ಹೋರಾಟ ಮಾಡುವುದು ನೋಡಿದರೆ ಆಶ್ಚರ್ಯ ಎನಿಸುತ್ತಿದೆ. ಈ ಹೋರಾಟ ಯಾವುದೇ ರಾಜಕೀಯ ದುರುದ್ದೇಶ ಆಗಿರದೆ ಇರಲಿ ಎನ್ನುವುದು ನಮ್ಮ ಆಶಯ. ಇಲ್ಲಿ ಜನಗಳ ಧಾರ್ಮಿಕ ಭಾವನೆಯ ಜೊತೆಗೆ ಪರಶುರಾಮರ ಘನತೆಗೆ ಧಕ್ಕೆಯಾಗಿದೆ. ಪ್ರತಿಯೊಬ್ಬ ಹಿಂದೂ ನ್ಯಾಯಕ್ಕಾಗಿ ಇದರಲ್ಲಿ ಜೊತೆಯಾಗಬೇಕು ಪಕ್ಷಾತೀತವಾಗಿ ನಿಲ್ಲಬೇಕು ಎಂದು ತಂಡ ಹೇಳಿದೆ.

ಲೋಕಾಯುಕ್ತದಲ್ಲಿ 28.07.2023 ರಂದುಮತ್ತು ಇತರ ಸಂಸ್ಥೆಗಳಲ್ಲಿ ಪ್ರಕರಣ ದಾಖಲಿಸಿದ್ದು, ಆದರೆ ಯಾವುದೇ ಕಡತಗಳು ಚಲಿಸುತ್ತಿಲ್ಲ. ಈಗ ಹೈಕೋರ್ಟ್‌ನಲ್ಲಿ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ(ಪಿಐಎಲ್)ಯನ್ನು ದಾಖಲಿಸಿ ಹೋರಾಡಲು ನಿರ್ಧರಿಸಿದ್ದೇವೆ ಮತ್ತು ನ್ಯಾಯವು ಮೇಲುಗೈ ಸಾಧಿಸುತ್ತದೆ, ಈ ಹಗರಣದಲ್ಲಿ ಭಾಗಿಯಾಗಿರುವ ಪ್ರತಿಯೊಬ್ಬರಿಗೂ ಶಿಕ್ಷೆಯಾಗುತ್ತದೆ ಎಂದು ಭಾವಿಸುತ್ತೇವೆ ಎಂದು ಪರಶುರಾಮ ಥೀಂ ಪಾರ್ಕ್‌ ಹೋರಾಟಗಾರ್ತಿ ದಿವ್ಯ ನಾಯಕ್‌ ನೇತೃತ್ವದ ಸಮಾನ ಮನಸ್ಕರ ತಂಡ ಪ್ರಕಟಣೆಯಲ್ಲಿ ತಿಳಿಸಿದೆ.

ದಿವ್ಯ ನಾಯಕ್‌ ಎನ್ನುವವರು ಪರಶುರಾಮ ಥೀಂ ಪಾರ್ಕ್‌ನಲ್ಲಿ ನಡೆದಿರುವ ಅವ್ಯವಹಾರವನ್ನು ಮಾಹಿತಿ ಹಕ್ಕಿನ ಮೂಲಕ ಬಯಲಿಗೆಳೆದಿದ್ದರು. ಆ ಬಳಿಕ ಈ ಪ್ರಕರಣ ರಾಜ್ಯದಾದ್ಯಂತ ಸುದ್ದಿಯಾಗಿತ್ತು.