ಯಕ್ಷಗಾನ ಕಲಾವಿದ ಹೇರಂಜಾಲು ರಾಜೇಂದ್ರ ಗಾಣಿಗ ನಿಧನ

ಕುಂದಾಪುರ: ಪ್ರತಿಭಾನ್ವಿತ ಯುವ ಯಕ್ಷಗಾನ ಕಲಾವಿದ ಹೇರಂಜಾಲು ರಾಜೇಂದ್ರ ಗಾಣಿಗ (41) ಅನಾರೋಗ್ಯದಿಂದ ಮಣಿಪಲ ಆಸ್ಪತ್ರೆಯಲ್ಲಿ ಸೆ.21ರಂದು ನಿಧನರಾದರು.

ಕಳೆದ 24 ವರ್ಷಗಳಿಗೂ ಹೆಚ್ಚು ಕಾಲ ಯಕ್ಷಗಾನ ಕಲಾವಿದರಾಗಿ ಸೇವೆ ಸಲ್ಲಿಸಿದ್ದರು. ಬಹುಬೇಗ ಯಕ್ಷಗಾನದ ಹೆಜ್ಜೆ, ಪ್ರಸಂಗಭ್ಯಾಸ ಮಾಡಿ ಯಕ್ಷಗಾನವನ್ನು ವೃತ್ತಿಯಾಗಿ ಸ್ವೀಕರಿಸಿದ ಇವರು ಭರವಸೆಯ ಕಲಾವಿದರಾಗಿ ಬೆಳೆದಿದ್ದರು. ಪುಂಡು ವೇಷ ಮಾಡುತ್ತ ಎಲ್ಲಾ ರೀತಿಯ ಪುರುಷ ವೇಷಗಳನ್ನು ನಿರ್ವಹಿಸುತ್ತಿದ್ದರು.

ಮಾರಣಕಟ್ಟೆ, ಹಾಲಾಡಿ, ಸೌಕೂರು, ಮಂದರ್ತಿ, ನೀಲಾವರ ಮೇಳಗಳಲ್ಲಿ ಸೇವೆ ಸಲ್ಲಿಸಿದ್ದರು. ಅವಿವಾಹಿತರಾಗಿದ್ದ ಇವರು ತಾಯಿ ಹಾಗು ಬಂಧು ಬಳಗವನ್ನು ಅಗಲಿದ್ದಾರೆ.