ಖಿನ್ನತೆ: ಇದಕ್ಕೆ ಚಿಕಿತ್ಸೆ ಪರಿಣಾಮಕಾರಿ

ಅವಿಭಜಿತ ದಕ್ಷಿಣ ಕನ್ನಡದ ಒಬ್ಬ ದೊಡ್ಡ ಹೃದಯದ ವೈದ್ಯರು ಆತ್ಮಹತ್ಯಾ ನಡವಳಿಕೆಯನ್ನು ಕೇವಲ ಖಿನ್ನತೆ-ಶಮನಕಾರಿ ಔಷಧಗಳು ಉಂಟುಮಾಡುತ್ತವೆ ಎಂದು ಮಾತನಾಡಿದ್ದಾರೆ ಮತ್ತು ಅಮೇರಿಕಾ ದೇಶದಲ್ಲಿ ಹದಿಹರೆಯದವರು ತಮ್ಮ ಸಹಪಾಠಿಗಳನ್ನು ಮತ್ತು ಶಿಕ್ಷಕರನ್ನು ಗುಂಡಿಕ್ಕಿ ಕೊಲ್ಲುವುದು ಖಿನ್ನತೆ-ಶಮನಕಾರಿ ಔಷಧಗಳು ತೆಗೆದುಕೊಂಡು ಎಂದು ಹೇಳಿರುತ್ತಾರೆ. ಹೈಪರ್‌ಆಕ್ಟಿವಿಟಿ ಚಿಕಿತ್ಸೆಗಾಗಿ ಮಕ್ಕಳಿಗೆ ನೀಡುವ ಔಷಧಗಳು ಅವರ ಮೆದುಳಿನ ರಾಸಾಯನಿಕಗಳನ್ನು ಹಾಳು ಮಾಡುತ್ತವೆ ಎಂದು ಅದೇ ವೀಡಿಯೋದಲ್ಲಿ ಅವರು ಹೇಳಿರುತ್ತಾರೆ. ಇದನ್ನು ಸುಶಿಕ್ಷಿತ ಶಾಲಾ ಶಿಕ್ಷಕರು ಒಬ್ಬರು ನನ್ನ ಗಮನಕ್ಕೆ ತಂದರು. ಅವರ ದೀರ್ಘ ಸಂದೇಶ ಹೀಗಿದೆ.
ಈ ವೈದ್ಯರು ಅವರು ಹೀಗೆ ಹೇಳುವುದಾ!!
ಡಿಪ್ರೆಷನ್ ಮಾತ್ರೆಗಳು ಆತ್ಮಹತ್ಯೆಗೆ ಕಾರಣ.
ADHDಗೆ ನೀಡುವ ಮಾತ್ರೆಗಳು. ಮೆದುಳಿನ ನ್ಯೂನ್ಯತೆಗೆ ಕಾರಣ. “ಈ ವೈದ್ಯರ ಬಗ್ಗೆ ಅಪಾರ ಗೌರವವಿತ್ತು. ಅವರು ತೆಂಗಿನೆಣ್ಣೆ ಆರೋಗ್ಯಕರ ಎಂದದನ್ನು ಎಲ್ಲರಲ್ಲಿಯೂ ಹೇಳುತ್ತಿದ್ದೆ. ಆಫ್ ಕೋರ್ಸ್ ಒಳ್ಳೆಯ ವೈದ್ಯರೇ ಮತ್ತು ವೈದ್ಯಕೀಯ ಸಂಗತಿಗಳನ್ನು ಜನಸಾಮಾನ್ಯರಿಗೂ ಮುಟ್ಟಿಸುವವರು. ಇವರ ಮಾತಿಗೆ ಎಲ್ಲೆಡೆಯೂ ನಂಬಿಕೆ, ಗೌರವಗಳು ಇವೆ. ಹಾಗಿರುವಾಗ ಇವರು… ತಮ್ಮದಲ್ಲದ ಮನೋವೈದ್ಯ ಕ್ಷೇತ್ರದ ಬಗ್ಗೆ ಮಾತನಾಡಬಾರದಿತ್ತಲ್ಲ. ಮಾತನಾಡುವುದಿದ್ದರೂ ಸಕಾರಾತ್ಮಕ ಸಂಗತಿಗಳನ್ನು ಜನತೆಗೆ ತಿಳಿಸಬಹುದಿತ್ತು. ಮೊನ್ನೆ ಮಾತನಾಡಿರುವುದು ಒಂದು ಸಂದರ್ಭದಲ್ಲಿ ಅಪ್ಪಿತಪ್ಪಿಯೋ ಎಂದರೆ ಅದೂ ಅಲ್ಲ. ಜನತೆಗೆ ಸಂದೇಶ ನೀಡುವ ವಿಡಿಯೋ ಕಾರ್ಯಕ್ರಮದಲ್ಲೇ. ಈ ಸಂಗತಿಯನ್ನು ಇಟ್ಟುಕೊಂಡೇ ಮಾತನಾಡಿದ್ದಾರೆ. ಬೇರೆ ಯಾರೋ ಮಾತನಾಡಿದ್ದರೆ ಅಲಕ್ಷಿಸಬಹುದಿತ್ತು. ಆದರೆ ಈ ವೈದ್ಯರ ಮಾತಿನ ಮೇಲೆ ಜನರಿಗೆ ನಂಬಿಕೆಯಿದ್ದು. ನೇರ ಪರಿಣಾಮವನ್ನುಂಟು ಮಾಡಬಲ್ಲುದು. ಮೊದಲೇ ಮಾನಸಿಕ ಆರೋಗ್ಯದ ಚಿಕಿತ್ಸೆಯ ವಿಷಯದಲ್ಲಿ ಜನತೆಗೆ ಸಾಕಷ್ಟು ಅಪನಂಬಿಕೆಗಳುಂಟು. ಇಂತಹ ಸಂದರ್ಭದಲ್ಲಿ ನಾವು ಜನತೆಯ ತಿಳುವಳಿಕೆಯ ದಿಕ್ಕು ತಪ್ಪಿಸುವುದು ಎಷ್ಟು ಸರಿ.? ಹಾಗಾಗಿ ಇಂತಹ ಹೇಳಿಕೆಯನ್ನು ಮನೋವೈದ್ಯರ ಸಂಘದಿಂದ ವಿರೋಧಿಸಲಾಗದೇ ಡಾಕ್ಟರ್?
ನಾನು ಅವರ ವಿದ್ಯಾರ್ಥಿ ಯಾಗಿರುವುದರಿಂದ ಅವರು ಸೃಷ್ಟಿಸಿರುವ ತಪ್ಪು ತಿಳುವಳಿಕೆಯನ್ನು ತೆರವುಗೊಳಿಸಲು ಪ್ರಯತ್ನಿಸುತ್ತೇನೆ. ಖಿನ್ನತೆಯಿಂದ ಬಳಲುತ್ತಿರುವ ರೋಗಿಗಳನ್ನು ಅವರೇ ನನ್ನ ಹತ್ತಿರ ಚಿಕಿತ್ಸೆಗಾಗಿ ಕಳುಹಿಸಿದ್ದಾರೆ. ಇನ್ನು ಮುಂದೆ ಅವರು ನನಗೆ ಕಳುಹಿಸದೇ ಇರಬಹುದು. ಸತ್ಯ ಯಾವಾಗಲೂ ಸತ್ಯ ಮತ್ತು ನಾನು ಸತ್ಯವನ್ನು ಹೇಳಬೇಕು.

ಅಧ್ಯಯನಗಳು, ಪ್ರಸ್ತುತ ಸಾಕ್ಷ್ಯವು ಖಿನ್ನತೆ-ಶಮನಕಾರಿಗಳ ಬಳಕೆ ಮತ್ತು ವಯಸ್ಕರಲ್ಲಿ ಆತ್ಮಹತ್ಯೆಯ ಅಪಾಯದ ನಡುವಿನ ಸ್ಪಷ್ಟ ಸಂಬಂಧವನ್ನು ಒದಗಿಸಲು ವಿಫಲವಾಗಿದೆ. ಆದಾಗ್ಯೂ, ಮಕ್ಕಳು ಮತ್ತು ಹದಿಹರೆಯದವರಲ್ಲಿ, ಆತ್ಮಹತ್ಯೆಯ ಆಲೋಚನೆಗಳು ಮತ್ತು ಪ್ರಯತ್ನಗಳ ಅಪಾಯವು ಸ್ವಲ್ಪ ಹೆಚ್ಚಾಗಿದೆ, ಆದರೆ ಅವರು ಆತ್ಮಹತ್ಯೆಯನ್ನು ಪೂರ್ಣಗೊಳಿಸುವುದಿಲ್ಲ ಎಂದು ಕಂಡುಬಂದಿದೆ. ಖಿನ್ನತೆ-ಶಮನಕಾರಿ ಔಷಧದಿಂದ ಪ್ರಚೋದಿಸಲ್ಪಟ್ಟ ಆತ್ಮಹತ್ಯೆಯ ಆಲೋಚನೆ ಮತ್ತು ಆತ್ಮಹತ್ಯಾ ನಡವಳಿಕೆ (ಪ್ರಾಥಮಿಕವಾಗಿ ಒಂದು ಗುಂಪಿನ ಔಷಧಗಳೊಂದಿಗೆ ಸೆಲೆಕ್ಟಿವ್ ಸಿರೊಟೋನಿನ್ ರಿ‌ಅಪ್ಟೇಕ್ ಇನ್ಹಿಬಿಟರ್ಸ್) ಅಪರೂಪವೆಂದು ಪರಿಗಣಿಸಲಾಗಿದೆ. ಇದು ಕೋವಿಡ್ ಲಸಿಕೆಗಳ ಅಡ್ಡಪರಿಣಾಮಗಳ ಟೀಕೆಗಳನ್ನು ಹೋಲುತ್ತದೆ. ಲಸಿಕೆಗಳು ಮನುಷ್ಯರಿಗೆ ಪ್ರಯೋಜನಕಾರಿ ಎಂದು ಸಾಬೀತಾಗಿರುವಂತೆಯೇ ಅದರ ಪ್ರಯೋಜನಗಳು ಸ್ಪಷ್ಟವಾಗಿ ಅಪಾಯಗಳನ್ನು ಮೀರಿಸುತ್ತದೆ. ಅದೇ ಧಾಟಿಯಲ್ಲಿ ಖಿನ್ನತೆ-ಶಮನಕಾರಿಗಳು ಆತ್ಮಹತ್ಯೆಗಳ ಅಪಾಯವನ್ನು ಮೀರಿಸುತ್ತದೆ ಮತ್ತು ವಾಸ್ತವವಾಗಿ ಆತ್ಮಹತ್ಯೆಗಳನ್ನು ತಡೆಯುತ್ತದೆ.

ಉನ್ನತ ಸ್ಥಾನದಲ್ಲಿರುವ ಜನರ ಈ ರೀತಿಯ ತಪ್ಪುದಾರಿಗೆಳೆಯುವ ಹೇಳಿಕೆಗಳು ಅನೇಕ ಜನರು ಚಿಕಿತ್ಸೆಯನ್ನು ನಿರಾಕರಿಸಲು ಕಾರಣವಾಗಬಹುದು ಎಂದು ನಾನು ಮನೋವೈದ್ಯನಾಗಿ ಚಿಂತಿತನಾಗಿದ್ದೇನೆ. ಚಿಕಿತ್ಸೆ ಸಿಗದ ಖಿನ್ನತೆಯ ರೋಗಿಯು ಆತ್ಮಹತ್ಯೆ ಮಾಡಿಕೊಳ್ಳಬಹುದು ಎಂಬುದು ಒಂದು ಅಪಾಯಕಾರಿ ಅಂಶವಾಗಿದೆ. ಖಿನ್ನತೆಯ ವೈದ್ಯಕೀಯ ಚಿಕಿತ್ಸೆಯಿಂದ ತಮ್ಮನ್ನು ತಾವು ವಂಚಿಸಿಕೊಳ್ಳುವ ಅನೇಕ ಜನರು ತಮ್ಮ ಖಿನ್ನತೆಯನ್ನು ನಿವಾರಿಸಲು ಆಲ್ಕೋಹಾಲ್ ಮತ್ತು ಇತರ ವಸ್ತುಗಳನ್ನು ಬಳಸಬಹುದು ಮತ್ತು ವ್ಯಸನಿಗಳಾಗಬಹುದು.

ಕ್ಲಿನಿಕಲ್ ಖಿನ್ನತೆಯು ದೈಹಿಕ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರುತ್ತದೆ ಎಂಬುದಕ್ಕೆ ಹೆಚ್ಚಿನ ಪುರಾವೆಗಳಿವೆ. ಪಾರ್ಶ್ವವಾಯು ಮತ್ತು ಹೃದಯಾಘಾತದಿಂದ ಚೇತರಿಸಿಕೊಳ್ಳುವ ಖಿನ್ನತೆ ಹೊಂದಿರುವ ಜನರು ಆರೋಗ್ಯ ರಕ್ಷಣೆಯ ಆಯ್ಕೆಗಳನ್ನು ಮಾಡಲು ಹೆಚ್ಚು ಕಷ್ಟಪಡುತ್ತಾರೆ ಎಂದು ಫಲಿತಾಂಶಗಳು ತೋರಿಸಿವೆ. ಅವರು ತಮ್ಮ ವೈದ್ಯರ ಸೂಚನೆಗಳನ್ನು ಅನುಸರಿಸುವುದು ಮತ್ತು ಅವರ ಅನಾರೋಗ್ಯದ ಸವಾಲುಗಳನ್ನು ನಿಭಾಯಿಸುವುದು ಹೆಚ್ಚು ಕಷ್ಟಕರವಾಗಿದೆ. ಹೃದಯಾಘಾತದ ನಂತರ ಮೊದಲ ಕೆಲವು ತಿಂಗಳಲ್ಲಿ ಹೆಚ್ಚಿನ ಖಿನ್ನತೆ ಹೊಂದಿರುವ ರೋಗಿಗಳು ಸಾವಿನ ಅಪಾಯವನ್ನು ಹೊಂದಿರುತ್ತಾರೆ ಎಂದು ಮತ್ತೊಂದು ಅಧ್ಯಯನವು ಕಂಡುಹಿಡಿದಿದೆ.
ಖಿನ್ನತೆಗೆ ಚಿಕಿತ್ಸೆ ಸಿಗದೆ ಅನೇಕ ಜನರು ತಮ್ಮ ಉದ್ಯೋಗವನ್ನು ಕಳೆದುಕೊಳ್ಳುತ್ತಾರೆ. ಖಿನ್ನತೆಯಿಂದ ಉಂಟಾಗುವ ಸೋಮಾರಿತನ, ವಿಳಂಬವನ್ನು ತಡೆದುಕೊಳ್ಳಲು ಸಾಧ್ಯವಾಗದೆ ಸುತ್ತಮುತ್ತಲಿನ ಜನರು ಅವರನ್ನು ತೊರೆಯಲು ಆರಂಭಿಸಿದಾಗ ಅನೇಕರು ತಮ್ಮ ಪ್ರೀತಿ ಪಾತ್ರರನ್ನು ಕಳೆದುಕೊಳ್ಳುತ್ತಾರೆ.

ಖಿನ್ನತೆಗೆ ಒಳಗಾದ ಜನರು “ತಮ್ಮನ್ನು ತಾವೇ ಮೇಲೆತ್ತಲು ಸಾಧ್ಯವಿಲ್ಲ ಅಥವಾ ಬೇರೆಯವರು ಮೇಲೆ ಎಳೆಯಲು ಸಾಧ್ಯವಿಲ್ಲ “ಮತ್ತು ಗುಣಪಡಿಸಲು ಸಾಧ್ಯವಿಲ್ಲ. ಖಿನ್ನತೆ-ಶಮನಕಾರಿಗಳು ಮತ್ತು/ಅಥವಾ ಮಾತು ಚಿಕಿತ್ಸೆ ಸೇರಿದಂತೆ ಸರಿಯಾದ ಚಿಕಿತ್ಸೆ ಇಲ್ಲದೆ, ಚಿಕಿತ್ಸೆ ನೀಡದ ಕ್ಲಿನಿಕಲ್ ಖಿನ್ನತೆಯು ವಾರಗಳು, ತಿಂಗಳುಗಳು ಅಥವಾ ವರ್ಷಗಳವರೆಗೆ ಇರುತ್ತದೆ. ಸರಿಯಾದ ಚಿಕಿತ್ಸೆಯು ಖಿನ್ನತೆಯಿರುವ ಹೆಚ್ಚಿನ ಜನರಿಗೆ ಸಹಾಯ ಮಾಡಬಹುದು. ಕ್ಲಿನಿಕಲ್ ಖಿನ್ನತೆ ಹೊಂದಿರುವ ೮೦% ಕ್ಕಿಂತ ಹೆಚ್ಚು ಜನರಿಗೆ ಆರಂಭಿಕ ಗುರುತಿಸುವಿಕೆ, ವೈಜ್ಞಾನಿಕ ಚಿಕಿತ್ಸೆ ಮತ್ತು ಬೆಂಬಲದೊಂದಿಗೆ ಸರಿಪಡಿಸಬಹುದು.

ಹೆಚ್ಚಿನ ಜನರು ಮಾತು ಚಿಕಿತ್ಸೆ, ಔಷಧಗಳು ಅಥವಾ ಎರಡರ ಸಂಯೋಜನೆಯನ್ನು ಬಳಸಿಕೊಂಡು ಖಿನ್ನತೆಯ ಚಿಕಿತ್ಸೆಗೆ ಉತ್ತಮವಾಗಿ ಸ್ಪಂದಿಸುತ್ತಾರೆ. ಔಷಧಿಗಳಿಗೆ ಪ್ರತಿಕ್ರಿಯಿಸದ, ಖಿನ್ನತೆ ಎಲೆಕ್ಟ್ರೋಕಾನ್ವಲ್ಸಿವ್ ಥೆರಪಿ ಅಥವಾ ಇಸಿಟಿಯಂತಹ ಪರ್ಯಾಯ ಚಿಕಿತ್ಸೆಗಳಿವೆ.
ಎಲ್ಲವನ್ನೂ ಅನುಮಾನಿಸಿ. ನಿಮ್ಮ ಸ್ವಂತ ಬೆಳಕನ್ನು ಹುಡುಕಿ. – ಬುದ್ಧ

ನಾನು ಇದನ್ನು ನೆನಪಿಸಿಕೊಳ್ಳುತ್ತೇನೆ ಮತ್ತು ಶ್ರೇಷ್ಠ ಹೃದ್ರೋಗ ತಜ್ಞರು ವೈಜ್ಞಾನಿಕ ಮನೋವೈದ್ಯಶಾಸ್ತ್ರದ ಮೇಲೆ ಮಾಡಿರುವ ಆರೋಪಗಳಿಗೆ ನನ್ನ ಮುಂದಿನ ಅಂಕಣಗಳಲ್ಲಿ ಪ್ರತಿಕ್ರಿಯಿಸುವುದನ್ನು ಮುಂದುವರಿಸುತ್ತೇನೆ.