ಕುಂದಾಪುರದ ಪ್ರಸಿದ್ಧ ಮಕ್ಕಳ ತಜ್ಞ ಡಾ.ಕೆ. ವೆಂಕಟರಾಜ್ ಇನ್ನಿಲ್ಲ

ಕುಂದಾಪುರ: ಪ್ರಸಿದ್ಧ ಮಕ್ಕಳ ತಜ್ಞ, ಕುಂದಾಪುರ ಸ್ವಾತಿ ಕ್ಲಿನಿಕ್‌ನ ಡಾ.ಕೆ.ವೆಂಕಟ್ ರಾಜ್ (67ವ) ಇನ್ನಿಲ್ಲ. ಹೃದಯ ಸಮಸ್ಯೆಯಿಂದ ಅವರು ನ.7ರಂದು ನಿಧನರಾದರು. ಅಸಂಖ್ಯ ಮಕ್ಕಳ ಪಾಲಿನ ದೇವರಾಗಿದ್ದ ಡಾ.ಕೆ.ವೆಂಕಟ ರಾಜ್ ಅವರು ಎಂಬಿಬಿ‌ಎಸ್, ಡಿಸಿ‌ಎಸ್ ಮುಗಿಸಿ ಮಕ್ಕಳ ತಜ್ಞರಾಗಿ ಕುಂದಾಪುರದಲ್ಲಿ ಕಳೆದ ಮೂರು ದಶಕಗಳಿಂದ ಸೇವೆ ಸಲ್ಲಿಸುತ್ತಿದ್ದರು.

ಬೈಂದೂರು ತಾಲೂಕಿನ ಉಪ್ಪುಂದವರಾದ ಇವರು ಪ್ರಸ್ತುತ ಅಂಕದಕಟ್ಟೆಯಲ್ಲಿ ನೆಲೆಸಿದ್ದರು. ಕುಂದಾಪುರ ಭಂಡಾರ್ಕಾಸ್ ಕಾಲೇಜಿನಲ್ಲಿ ಪದವಿಪೂರ್ವ ಶಿಕ್ಷಣ ಪಡೆದು ಬಳಿಕ ಮಣಿಪಾಲ ಕೆ‌ಎಂಸಿಯಲ್ಲಿ ವೈದ್ಯಕೀಯ ಶಿಕ್ಷಣ ಪಡೆದಿದ್ದರು.

ಇತ್ತೀಚೆಗೆ ಹೃದಯ ಸಮಸ್ಯೆಯಿಂದ ಬಳಲುತ್ತಿದ್ದ ಅವರು ಬೆಂಗಳೂರಿನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಸ್ವಾತಿ ಕ್ಲಿನಿಕ್ ಅವಿಭಜಿತ ಕುಂದಾಪುರ ತಾಲೂಕು ಮಾತ್ರವಲ್ಲ ಬೇರೆ ಬೇರೆ ಕಡೆಯಿಂದಲೂ ಮಕ್ಕಳನ್ನು ಚಿಕಿತ್ಸೆಗಾಗಿ ಕರೆತರಲಾಗುತ್ತಿತ್ತು. ಮಕ್ಕಳ ಬಗ್ಗೆ ಅತೀವ ಕಾಳಜಿ, ಚಿಕಿತ್ಸೆಗೆ ಬರುವ ಮಕ್ಕಳ ಬಗ್ಗೆ ಸಮಗ್ರವಾಗಿ ವಿಚಾರಿಸಿಕೊಂಡು ಔಷಧ ಕೊಡುತ್ತಿದ್ದರು. ಮನೆಗೆ ದೂರವಾಣಿ ಮಾಡಿದರೂ ಕೂಡಾ ಪೋನ್‌ನಲ್ಲಿ ಸಲಹೆ ಸೂಚನೆ ನೀಡುತ್ತಿದ್ದರು.

ಮೃತರು ತಂದೆ, ಪತ್ನಿ, ಪುತ್ರ ಯುರಾಲಾಜಿಸ್ಟ್ ಡಾ.ಕಿಶನ್ ರಾಜ್, ಪುತ್ರಿ, ಸೊಸೆ ಹಾಗೂ ಅಪಾರ ಬಂಧು-ಬಳಗವನ್ನು ಅಗಲಿದ್ದಾರೆ.