ಮಾಣಿಗೋಪಾಲರ ಆತ್ಮಕಥನ ‘ನಾನು ಮಾಣಿಗೋಪಾಲ’ ಪುಸ್ತಕ ಬಿಡುಗಡೆ

ಕುಂದಾಪುರ: ಉಡುಪಿ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತು ಕುಂದಾಪುರ ತಾಲೂಕು ಘಟಕ ವತಿಯಿಂದ ಸಾಮಾಜಿಕ ಹೋರಾಟಗಾರ, ಹಿರಿಯ ನೇತಾರ ಮಾಣಿ ಗೋಪಾಲ್ ಅವರ ಆತ್ಮಕಥನ ‘ನಾನು ಮಾಣಿಗೋಪಾಲ’ ಪುಸ್ತಕ ಬಿಡುಗಡೆ ಕಾರ್ಯಕ್ರಮ ಅ.೧೮ರಂದು ಕುಂದಾಪುರದ ಬೋರ್ಡ್ ಹೈಸ್ಕೂಲ್ ವಠಾರದ ರೋಟರಿ ಕಲಾಮಂದಿರದಲ್ಲಿ ನಡೆಯಿತು.

ಪತ್ರಕರ್ತ ಕೇಶವ ಸಸಿಹಿತ್ಲು ಅವರ ನಿರೂಪಣೆಯ ನಾನು ಮಾಣಿಗೋಪಾಲ ಕೃತಿಯನ್ನು ಅನಾವರಣ ಮಾಡಿದ ಮೂಡುಬಿದಿರೆಯ ಆಳ್ವಾಸ್ ಶಿಕ್ಷಣ ಸಂಸ್ಥೆಯ ಅಧ್ಯಕ್ಷ ಡಾ| ಎಂ. ಮೋಹನ್ ಆಳ್ವ ಅವರು ಮಾತನಾಡಿ, ಮಾಣಿಗೋಪಾಲರು ಬಡವರ ಪರವಾಗಿ ನಿಂತವರು. ಮೂರ್ತೆದಾರರ ಪರ ಹೋರಾಟದಲ್ಲಿ ಮುಂಚೂಣಿಯಲ್ಲಿ ಗುರುತಿಸಿಕೊಂಡ ನಾಯಕ.ಅಂದಿನ ಕಾಲಘಟ್ಟದಲ್ಲಿ ಅಂತಹ ಹೋರಾಟ ಮಾಡಲು ಧೈರ್ಯಬೇಕು, ನಾಯಕತ್ವ ಬೇಕು, ಸ್ಪಷ್ಟ ನಿಲುವು ಬೇಕಿತ್ತು. ಅದೆಲ್ಲವೂ ಅವರಲ್ಲಿತ್ತು. ಮುಂದೆ ತನ್ನ ಬದುಕನ್ನು ಇಂಥಹ ಸಾಮಾಜಿಕ ಹೋರಾಟಗಳಿಗೆ ಮುಡಿಪಾಗಿಟ್ಟವರು. ನ್ಯಾಯಮಾರ್ಗದಲ್ಲಿ ಮುನ್ನೆಡೆದವರು. ರಾಜಕೀಯದಲ್ಲೂ ಕಳಂಕ ರಹಿತವಾಗಿ ಗುರುತಿಸಿಕೊಂಡವರು ಎಂದು ಅವರು ಅಭಿಪ್ರಾಯ ಪಟ್ಟರು.

ಸಂಸದ ಕೋಟ ಶ್ರೀನಿವಾಸ ಪೂಜಾರಿ ಅವರು ಮೂರ್ತೆದಾರರ ಪ್ರತಿನಿಧಿಯಾಗಿ ಮಾಣಿಗೋಪಾಲ ವಿಷಯದ ಬಗ್ಗೆ ಮಾತನಾಡಿ, ಮಾಣಿ ಗೋಪಾಲರು, ಆವತ್ತು ಉದ್ಯೋಗ ಕಳೆದುಕೊಂಡು ಬದುಕಿನ ದಾರಿಯನ್ನೇ ಕಳೆದುಕೊಂಡು ಹಸಿವಿನಿಂದ ನರಳಬೇಕಾದ ಅಸಹಾಯ ಸ್ಥಿತಿ ಎದುರಾದಾಗ ಅವರ ನೆರವಿಗೆ ಬಂದವರು ಮಾಣಿಗೋಪಾಲರು ಅವರೆನ್ನೆಲ್ಲಾ ಸಂಘಟಿಸಿ ಶಾಂತಿಯುತ ಆಂದೋಲನ ನಡೆಸಿದರು. ಸಹಿ ಮಾಡಲು ಸಹ ಗೊತ್ತಿಲ್ಲದ ಮೂರ್ತೆದಾರರ ಪರ ಗಟ್ಟಿ ಧ್ವನಿಯಲ್ಲಿ ನಿಂತು ಹೋರಾಡಿದವರು. ಅವರ ಹೋರಾಟದ ಫಲವಾಗಿ ಬಂಗಾರಪ್ಪನವರು ಮುಖ್ಯಮಂತ್ರಿಯಾಗಿ ನಡೆಸಿದ ಮೊದಲ ಸಂಪುಟ ಸಭೆಯಲ್ಲಿಯೇ ನಿಷೇಧವನ್ನು ವಾಪಾಸು ತೆಗೆದುಕೊಂಡರು. ಇಂಥಹ ಯಶಸ್ಸು ಅವರಿಗೆ ಸಲ್ಲುತ್ತದೆ ಎಂದರು.

ಮಾಜಿ ಸಚಿವ ಜಯಪ್ರಕಾಶ್ ಹೆಗ್ಡೆ ಮಾಣಿಗೋಪಾಲರು ಮತ್ತು ಸಮಾಜವಾದಿ ಸಿದ್ಧಾಂತದ ಬಗ್ಗೆ ಮಾತನಾಡಿ, ಮಾಣಿಗೋಪಾಲರು ಜನರ ಮಧ್ಯೆಯೇ ಇದ್ದುಕೊಂಡು, ಜನರ ಸಮಸ್ಯೆಗಳಿಗೆ ಸ್ಪಂದಿಸಿದವರು. ಮಾಣಿಗೋಪಾಲರು ವಿಧಾನಸಭೆಯಲ್ಲಿ ಇರಬೇಕಿತ್ತು. ಬಡವರ ಪರ ಅವರ ಕಾಳಜಿ, ಸಿದ್ಧಾಂತಗಳು ಮಾದರಿಯಾಗಿದ್ದವು ಎಂದರು.

ಶಾಸಕ ಕಿರಣ್ ಕುಮಾರ್ ಕೊಡ್ಗಿ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿ, ಮಾಣಿಗೋಪಾಲರು ಬೇರೆ ಬೇರೆ ಪಕ್ಷದಲ್ಲಿದ್ದರೂ, ಸ್ನೇಹ, ವಿಶ್ವಾಸ ಇಂದಿಗೂ ಹಾಗೆಯೇ ಇದೆ. ಶಾಸಕರಾಗುವ ಎಲ್ಲಾ ಆರ್ಹತೆ, ಯೋಗ್ಯತೆ ಅವರಿಗಿತ್ತು. ಆದರೆ ಯೋಗ ಮಾತ್ರ ಇರಲಿಲ್ಲ. ಅವರೊಬ್ಬ ಅಜಾತಶತ್ರುವಾಗಿದ್ದರು ಎಂದರು.

ಕಸಾಪ ಜಿಲ್ಲಾಧ್ಯಕ್ಷ ನೀಲಾವರ ಸುರೇಂದ್ರ ಅಡಿಗ ಅಧ್ಯಕ್ಷತೆ ವಹಿಸಿದ್ದರು. ಮಾಜಿ ಶಾಸಕ ಕೆ. ಗೋಪಾಲ ಪೂಜಾರಿ ಅವರು ಮಾಣಿಗೋಪಾಲರ ವ್ಯಕ್ತಿತ್ವವನ್ನು ತರೆದಿಟ್ಟರು.

ಕಸಾಪ ಸ್ಥಾಪಕಾಧ್ಯಕ್ಷ ಎ.ಎಸ್.ಎನ್. ಹೆಬ್ಬಾರ್, ಕ.ಸಾ.ಪ ಕುಂದಾಪುರ ತಾಲೂಕು ಅಧ್ಯಕ್ಷ ಡಾ| ಉಮೇಶ್ ಪುತ್ರನ್, ಪುರಸಭೆ ಅಧ್ಯಕ್ಷ ಮೋಹನದಾಸ್ ಶೆಣೈ, ಕೃತಿ ಲೇಖಕ ಕೇಶವ ಸಸಿಹಿತ್ಲು, ಮಾಣಿ ರಂಜನ್ ಉಪಸ್ಥಿತರಿದ್ದರು.

ಈ ಸಂದರ್ಭದಲ್ಲಿ ಮಾಣಿಗೋಪಾಲ್ ಹಾಗೂ ಗಿರಿಜಾ ದಂಪತಿಯನ್ನು ಸಮ್ಮಾನಿಸಲಾಯಿತು.

ನರೇಂದ್ರ ಕುಮಾರ್ ಕೋಟ ಸ್ವಾಗತಿಸಿದರು. ಕಸಾಪದ ಗೌರವ ಕಾರ್ಯದರ್ಶಿ ಸುಬ್ರಹ್ಮಣ್ಯ ಶೆಟ್ಟಿ ಪ್ರಸ್ತಾವಿಕ ಮಾತುಗಳನ್ನಾಡಿದರು. ಪತ್ರಕರ್ತ ಯು.ಎಸ್.ಶೆಣೈ ನಲ್ನುಡಿಗಳನ್ನಾಡಿದರು. ಮನೋಹರ್ ಭಟ್ ವಂದಿಸಿದರು. ದಿನಕರ ಆರ್. ಶೆಟ್ಟಿ, ಮಂಜುನಾಥ ಕೆ.ಎಸ್., ಅಕ್ಷತಾ ಗಿರೀಶ್ ಕಾರ್ಯಕ್ರಮ ನಿರ್ವಹಿಸಿದರು.