ಪ್ರತಿಷ್ಠಿತ ‘ಇಡಗುಂಜಿ ಮಹಾಗಣಪತಿ ಯಕ್ಷಗಾನ ಮೇಳ’ಕ್ಕೆ ವಿಶ್ವಸಂಸ್ಥೆ ಮಾನ್ಯತೆ !

ಜನಪ್ರತಿನಿಧಿ (ಹೊನ್ನಾವರ) : ‘ಇಡಗುಂಜಿ ಮಹಾಗಣಪತಿ ಯಕ್ಷಗಾನ ಮೇಳ’ಕ್ಕೆ ವಿಶ್ವಸಂಸ್ಥೆ ಮಾನ್ಯತೆ ಸಿಕ್ಕಿದೆ. ಮಾನ್ಯತೆ ಪಡೆದ ಜಗತ್ತಿನ 58 ರಾಷ್ಟ್ರೀಯ ಸಂಸ್ಥೆಗಳ ಪಟ್ಟಿಯಲ್ಲಿ 1934ರಲ್ಲಿ ಸ್ಥಾಪಿತವಾಗಿರುವ ಇಡಗುಂಜಿ ಯಕ್ಷಗಾನ ಮಂಡಳಿ ಕೂಡ ಒಂದು ಎನ್ನುವುದು ವಿಶೇಷ.

ಈ ಸಂಬಂಧಿಸಿದಂತೆ ಪ್ರತಿಕ್ರಿಯಿಸಿರುವ ಮಂಡಳಿಯ ನಿರ್ದೇಶಕ ಕೆರೆಮನೆ ಶಿವಾನಂದ ಹೆಗಡೆ, ಯಕ್ಷಗಾನ ಪರಂಪರೆ, ಕಲಾ ಪ್ರಕಾರವನ್ನು ಬೆಳೆಸುವ ನಿಟ್ಟಿನಲ್ಲಿ ಮಂಡಳಿಯ ಕೊಡುಗೆ, ಯಕ್ಷಗಾನ ಕಲೆಯ ಪ್ರಚಾರ, ದಾಖಲಾತಿ ಮೊದಲಾದ ಅಂಶಗಳನ್ನು ಪರಿಗಣಿಸಿ ವಿಶ್ವಸಂಸ್ಥೆ ಮಾನ್ಯತೆ ನೀಡಿದೆ ಎಂದಿದ್ದಾರೆ.

ಯಕ್ಷಗಾನ ಪ್ರದರ್ಶನ, ತರಬೇತಿ ಕಾರ್ಯಾಗಾರ, ಪ್ರತಿ ವರ್ಷ ರಾಷ್ಟ್ರೀಯ ನಾಟ್ಯೋತ್ಸವ ಸಂಘಟನೆ ಮೊದಲಾದ ಕಾರ್ಯಗಳನ್ನು 90 ವರ್ಷಗಳಿಂದ ಮಂಡಳಿ ಮುನ್ನಡೆಸಿದೆ. ವಿಶ್ವ ಸಂಸ್ಥೆಯ ಮಾನ್ಯತೆ ಮಂಡಳಿಯ ಕಾರ್ಯಕ್ಕೆ ಇನ್ನಷ್ಟು ನೈತಿಕ ಬಲ ನೀಡಿದೆ’ ಎಂದವರು ತಿಳಿಸಿದ್ದಾರೆ.