ಕ್ರಿಕೆಟ್‌ ಇತಿಹಾಸದ “ಧ್ರುವತಾರೆ”  ಡೆರೆಕ್  ಅಂಡರ್‌ವುಡ್‌

ಸಾರ್ವಕಾಲಿಕ ಶ್ರೇಷ್ಠ ಬೌಲರ್‌ : ಅಂಡರ್‌ವುಡ್‌ ಅವರ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಬದುಕು ಗಮನಾರ್ಹವಾಗಿತ್ತು . ಅವರು 86 ಟೆಸ್ಟ್ ಪಂದ್ಯಗಳು ಮತ್ತು 26 ಏಕದಿನ ಅಂತರಾಷ್ಟ್ರೀಯ ಪಂದ್ಯಗಳಲ್ಲಿ ಇಂಗ್ಲೆಂಡ್ ತಂಡವನ್ನು ಪ್ರತಿನಿಧಿಸಿದ್ದರು. ಆಗ ಅವರು  ದೇಶದ ಸಾರ್ವಕಾಲಿಕ ಶ್ರೇಷ್ಠ ಬೌಲರ್‌ಗಳಲ್ಲಿ ಒಬ್ಬರಾಗಿ ತಮ್ಮ ಸ್ಥಾನವನ್ನು ಭದ್ರಪಡಿಸಿಕೊಂಡಿದ್ದರು. ಟೆಸ್ಟ್ ಕ್ರಿಕೆಟ್‌ನಲ್ಲಿ ಬೆರಗುಗೊಳಿಸುವ 297 ವಿಕೆಟ್‌ಗಳೊಂದಿಗೆ ಸಮಕಾಲೀನ ಬೌಲರುಗಳಲ್ಲಿ ಅವರು ಬಹಳ ಜನಪ್ರಿಯರಾಗಿದ್ದರು. ಇದು ಇಂಗ್ಲೆಂಡ್‌ನಲ್ಲಿ ಯಾವುದೇ ಸ್ಪಿನ್ನರ್‌ನ ಅತಿ ಹೆಚ್ಚು ವಿಕೆಟ್‌ಗಳನ್ನು  ಹೊಂದಿರುವ ದಾಖಲೆಯಾಗಿದೆ.

ಗವಾಸ್ಕರ್  12 ಬಾರಿ ಔಟ್ : ಅಂಡರ್‌ವುಡ್ ಅವರ ಕ್ರಿಕೆಟ್ ಬದುಕಿನಲ್ಲಿ ಸಂಖ್ಯೆಗಳು ಕಥೆಯ ಒಂದು ಭಾಗವನ್ನು ಮಾತ್ರ ಹೇಳುತ್ತವೆ.1977ರಲ್ಲಿ ಭಾರತ ವಿರುದ್ಧದ ಟೆಸ್ಟ್‌ ಸರಣಿಯಲ್ಲಿ  29 ವಿಕೆಟ್‌ಗಳನ್ನು ಕಬಳಿಸಿ ಇಂಗ್ಲೆಂಡ್‌ಗೆ ಐದು ಪಂದ್ಯಗಳ ಸರಣಿಯಲ್ಲಿ  3-1 ಅಂತರದ ಗೆಲುವು ತಂದುಕೊಟ್ಟದ್ದು ಅವರ ಸಾಧನೆಯ ಅತ್ಯುತ್ತಮ ಕ್ಷಣಗಳಲ್ಲಿ ಒಂದಾಗಿದೆ. ನಿಖರ ಮತ್ತು ಸ್ಟಂಪ್‌ನಲ್ಲಿ ಬೌಲ್ ಮಾಡುವ ಇವರ ಬೌಲಿಂಗ್ ಕೌಶಲ್ಯಕ್ಕೆ  ಭಾರತದ ಅಪ್ರತಿಮ ಬ್ಯಾಟರ್ ಸುನಿಲ್  ಗವಾಸ್ಕರ್ ಟೆಸ್ಟ್ ಕ್ರಿಕೆಟ್‌ನಲ್ಲಿ 12 ಬಾರಿ ಬಲಿಯಾಗಿದ್ದರು. ಅದರಲ್ಲೂ ಭಾರತದ  ವಿರುದ್ಧ ಅವರು ಅದ್ಭುತ ಪ್ರದರ್ಶನ ನೀಡಿದ್ದರು. ಅಂಡರ್‌ವುಡ್ ಭಾರತದ ವಿರುದ್ಧ 20 ಟೆಸ್ಟ್‌ ಪಂದ್ಯಗಳನ್ನು ಆಡಿದ್ದು 62 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಇದು ಅವರ ಅದ್ಭುತ ಪ್ರಯತ್ನವಾಗಿತ್ತು,

ಹಾಲ್ ಆಫ್ ಫೇಮ್‌ಗೆ ಸೇರ್ಪಡೆ : ಅಂಡರ್‌ವುಡ್ ತನ್ನ ಆಟದ ದಿನಗಳನ್ನು ಮೀರಿ ಕ್ರಿಕೆಟ್‌ಗೆ ವಿಶೇಷವಾದ ಕೊಡುಗೆ ಹಾಗೂ ಮಾರ್ಗದರ್ಶನ ನೀಡಿದ್ದಾರೆ. ಅವರು 2006 ರಲ್ಲಿ ಕೆಂಟ್ ಕ್ರಿಕೆಟ್ ಕ್ಲಬ್‌ನ ಅಧ್ಯಕ್ಷರಾಗಿ, 2008 ರಲ್ಲಿ ಮೇರಿಲ್ಬೋನ್ ಕ್ರಿಕೆಟ್ ಕ್ಲಬ್  ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದರು. ಅವರ ಕ್ರಿಕೆಟ್‌ ಜೀವನದ ಸಾಧನೆ ಮತ್ತು ಕ್ರಿಕೆಟ್‌ ಆಟದ ಅಭಿವೃದ್ಧಿ ಮತ್ತು ಆಡಳಿತ ಪ್ರಭುತ್ವವನ್ನು ಗುರುತಿಸಿ ಅವರನ್ನು 2009ರಲ್ಲಿ ಐಸಿಸಿ  ಹಾಲ್ ಆಫ್ ಫೇಮ್‌ಗೆ ಸೇರ್ಪಡೆಗೊಳಿಸಲಾಗಿದೆ. ಆಟಗಾರರ ಮತ್ತು ಅಭಿಮಾನಿಗಳ ಪೀಳಿಗೆಗೆ ಸಮಾನ ಸ್ಪೂರ್ತಿ ನೀಡಿದ ಈ ದಿಗ್ಗಜ ಸ್ಪಿನ್ನರ್ 2024ರ ಏಪ್ರಿಲ್ -15ರಂದು  ತಮ್ಮ 78ನೇ ವಯಸ್ಸಿನಲ್ಲಿ ಕೊನೆಯುಸಿರೆಳೆದರು.ಡೆರೆಕ್ ಅಂಡರ್‌ವುಡ್‌ ಅವರ ನಿಧನವು  ಇಂಗ್ಲಿಷ್ ಕ್ರಿಕೆಟ್‌ನಲ್ಲಿ ಒಂದು ಯುಗದ ಅಂತ್ಯವನ್ನು ಸೂಚಿಸಿದೆ. ಅವರು ಕ್ರಿಕೆಟ್ ಇತಿಹಾಸದ ‘ಧ್ರುವತಾರೆ’ ಆಗಿದ್ದಾರೆ. ಅವರ ನೆನಪು ಕ್ರಿಕೆಟ್ ಜಗತ್ತಿನಲ್ಲಿ ಮರೆಯಲಾಗದು.