ಪಂಚಶಂಕರನಾರಾಯಣ ದೇವಸ್ಥಾನಗಳಲ್ಲಿ ಮಹಾಶಿವರಾತ್ರಿ ವಿಶೇಷ

ಕುಂದಾಪುರ, ಮಾ.೮: ಉಡುಪಿ ಜಿಲ್ಲೆಯ ಪಂಚಶಂಕರನಾರಾಯಣ ಕ್ಷೇತ್ರಗಳಲ್ಲಿ ಮಹಾಶಿವರಾತ್ರಿಯ ಪ್ರಯುಕ್ತ ವಿಶೇಷ ಧಾರ್ಮಿಕ ಕಾರ್ಯಕ್ರಮಗಳು ಸಂಪನ್ನಗೊಂಡವು. ಕರಾವಳಿ ಕರ್ನಾಟಕದಲ್ಲಿ ಪಂಚಶಂಕರನಾರಾಯಣ ಕ್ಷೇತ್ರಗಳು ಬಹಳ ಪುರಾಣ ಪ್ರಸಿದ್ಧ ಧಾರ್ಮಿಕ ಕ್ಷೇತ್ರಗಳಾಗಿದ್ದು ಮಹಾಶಿವರಾತ್ರಿಯ ದಿನ ಈ ಐದು ಶಂಕರನಾರಾಯಣ ಕ್ಷೇತ್ರಗಳನ್ನು ದರ್ಶನ ಮಾಡಿದ ಕಾಶಿ ಯಾತ್ರೆ ಮಾಡಿದ ಪುಣ್ಯ ಲಭಿಸುತ್ತದೆ ಎನ್ನುವ ಪ್ರತೀತಿ ಇದೆ.

ಕ್ರೋಡ ಶಂಕರನಾರಾಯಣ ದೇವಸ್ಥಾನ, ಹೊಳೆ ಶಂಕರನಾರಾಯಣ, ಮಾಂಡವಿ ಶಂಕರನಾರಾಯಣ, ಬೆಳ್ವೆ ಶಂಕರನಾರಾಯಣ, ಆವರ್ಸೆ ಶಂಕರನಾರಾಯಣ ಇವು ಪಂಚ ಶಂಕರನಾರಾಯಣ ಕ್ಷೇತ್ರಗಳಾಗಿವೆ. ಈ ಐದು ಕ್ಷೇತ್ರಗಳಲ್ಲಿ ಶಂಕರನಾರಾಯಣರು ಉದ್ಭವಿಸಿದ ಐತಿಹ್ಯವಿದೆ. ಖರಾರಟ್ಟಾಸುರರ ವಧಿಸಲು ಪಂಚಮುನಿಗಳಾದ ಕ್ರೋಡ, ಅಗಸ್ತ್ಯ, ಮಾಂಡವ್ಯ, ಜಮದಗ್ನಿ, ಲೋಮಷ ಮುನಿಗಳು ಏಕಕಾಲದಲ್ಲಿ ತಪಸ್ಸು ಮಾಡಿ ಏಕಕಾಲದಲ್ಲಿ ಶಂಕರನಾರಾಯಣರನ್ನು ಒಲಿಸಿಕೊಂಡ ಕಾರಣ ಈ ಐದು ಕ್ಷೇತ್ರಗಳು ಪ್ರಸಿದ್ಧಿ ಪಡೆದಿವೆ.