ಫೆ.04ಕ್ಕೆ ಸತೀಶ್‌ ಶೆಟ್ಟಿ ವಕ್ವಾಡಿ ಅವರ ʼಕೊನೆಯ ಎರಡು ಎಸೆತಗಳುʼ ಕಥಾ ಸಂಕಲನ ಬಿಡುಗಡೆ

ಜನಪ್ರತಿನಿಧಿ ವಾರ್ತೆ (ಬೆಂಗಳೂರು) : ಇಲ್ಲಿನ ಬಿಬಿ ಪಬ್ಲಿಕೇಷನ್ಸ್‌ ಹೊರತರುತ್ತಿರುವ ಸತೀಶ್‌ ಶೆಟ್ಟಿ ವಕ್ವಾಡಿ ಅವರ ಎರಡನೇ ಕಥಾ ಸಂಕಲನ ʼಕೊನೆಯ ಎರಡು ಎಸೆತಗಳುʼ ಕೃತಿಯ ಬಿಡುಗಡೆ ಸಮಾರಂಭ ಇದೇ ಬರುವ ಭಾನುವಾರ (ಫೆ.04)ದಂದು ಪುರವಂಕರ ಸಭಾಂಗಣ, ಸುಚಿತ್ರ, ಬಿ.ವಿ. ಕಾರಂತ ರಸ್ತೆ ಬನಶಂಕರಿ ಎರಡನೇ ಹಂತ, ಬೆಂಗಳೂರಿನಲ್ಲಿ ಬೆಳಗ್ಗೆ ಪೂರ್ವಾಹ್ನ 10:30ರಿಂದ ನಡೆಯಲಿದೆ ಎಂದು ಕೃತಿಕಾರ ಸತೀಶ್‌ ಶೆಟ್ಟಿ ವಕ್ವಾಡಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಕನ್ನಡದ ಖ್ಯಾತ ಚಿತ್ರ ಸಾಹಿತಿ ಹಾಗೂ ಕಥೆಗಾರ ಜಯಂತ ಕಾಯ್ಕಿಣಿ ಕೃತಿ ಬಿಡುಗಡೆ ಮಾಡಲಿದ್ದು, ಕಥೆಗಾರ, ಕಾದಂಬರಿಕಾರ ಡಾ. ಅಮರೇಶ ನುಗಡೋಣಿ ಕೃತಿಯ ಕುರಿತು ಮಾತನಾಡಲಿದ್ದಾರೆ. ಕಾರ್ಯಕ್ರಮದಲ್ಲಿ ಕುಂದಗನ್ನಡ ಸಾಂಸ್ಕೃತಿಕ ರಾಯಭಾರಿ ಮನು ಹಂದಾಡಿ ಕುಂದಾಪುರ ಕನ್ನಡದ ಸೊಗಸು ಚೆಲ್ಲಲಿದ್ದಾರೆ.

ಕೃತಿ ಬಿಡುಗಡೆ ಕಾರ್ಯಕ್ರಮ ಆದ ಬಳಿಕ ಕೃತಿಕಾರರೊಂದಿಗೆ ಸಂವಾದ ಕಾರ್ಯಕ್ರಮ ಏರ್ಪಡಿಸಿದ್ದು, ಕಥೆಗಾರ ಹಾಗೂ ಪ್ರಕಾಶಕ ಶ್ರೀಧರ ಬನವಾಸಿ ʼಲೇಖಕರೊಂದಿಗೆ ಮಾತುಕತೆʼಯನ್ನು ನಡೆಸಿಕೊಡಲಿದ್ದಾರೆ.

ಬುಕ್‌ ಬ್ರಹ್ಮದ ಪ್ರಧಾನ ಸಂಪಾದಕ ದೇವು ಪತ್ತಾರ ಪ್ರಸ್ತಾವಿಸಿ, ಸ್ವಾಗತಿಸಲಿದ್ದು, ಲೇಖಕಿ ರೇವತಿ ಶೆಟ್ಟಿ ಕೋಟ ಕಾರ್ಯಕ್ರಮ ನಿರೂಪಿಸಿ, ಬುಕ್‌ ಬ್ರಹ್ಮದ ಹಿರಿಯ ಉಪ ಸಂಪಾದಕಿ ಪ್ರಜ್ಞಾ ಬಾರ್ಯ ತಂತ್ರಿ ವಂದನಾರ್ಪಣೆ ಮಾಡಲಿದ್ದಾರೆ ಎಂದು ಪ್ರಕಟಣೆಯಲ್ಲಿ ಕೃತಿಕಾರರು ತಿಳಿಸಿದ್ದಾರೆ.