ತಲ್ಲೂರು ಜಯರಾಣಿ ಶಾಲೆಯಲ್ಲಿ ಜಿಲ್ಲಾಮಟ್ಟದ ಖೋ ಖೋ ಪಂದ್ಯಾಟ: ಕುಚ್ಚೂರು ಹಾಗೂ ಆವರ್ಸೆ ಶಾಲೆಗಳಿಗೆ ಅಗ್ರಸ್ಥಾನ

ಕುಂದಾಪುರ: ತಲ್ಲೂರು ಜಯರಾಣಿ ಆಂಗ್ಲ ಮಾಧ್ಯಮ ಶಾಲೆಯಲ್ಲಿ ಸೆಪ್ಟೆಂಬರ್ 17ರಂದು 18 ವರ್ಷದೊಳಗಿನ ಬಾಲಕ ಮತ್ತು ಬಾಲಕಿಯರ ಜಿಲ್ಲಾಮಟ್ಟದ ಖೋ ಖೋ ಪಂದ್ಯಾಟವನ್ನು ಅತ್ಯಂತ ವಿಜೃಂಭಣೆಯಿಂದ ಆಯೋಜಿಸಲಾಗಿತ್ತು.

ಕಾರ್ಯಕ್ರಮವನ್ನು ಸಾಮಾಜಿಕ ಹೋರಾಟಗಾರ ಹಾಗೂ ಗ್ರಾಮ ಪಂಚಾಯತ್ ಮಾಜಿ ಸದಸ್ಯರಾದ ಉದಯ ಕುಮಾರ್ ತಲ್ಲೂರು ಅವರು ಉದ್ಘಾಟಿಸಿದರು. ಉಡುಪಿ ಜಿಲ್ಲಾ ದೈಹಿಕ ಶಿಕ್ಷಕರ ಸಂಘದ ಅಧ್ಯಕ್ಷರಾದ ವಿಜಯಕುಮಾರ್ ಶೆಟ್ಟಿ ಅವರು ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು.

ಮುಖ್ಯ ಅತಿಥಿಗಳಾಗಿ ಗ್ರೇಡ್ ೧ ಶಿಕ್ಷಕರ ಸಂಘದ ಅಧ್ಯಕ್ಷರಾದ ಕುಸುಮಾಕರ್, ಹೆಮ್ಮಾಡಿ ಶಿಕ್ಷಣ ಸಂಯೋಜಕರಾದ ಯೋಗೀಶ್. ಕೆ , ತಲ್ಲೂರು ಸಮೂಹ ಸಂಪನ್ಮೂಲ ವ್ಯಕ್ತಿಗಳಾದ ರವಿಚಂದ್ರ, ಬೈಂದೂರು ಪ್ರಭಾರ ದೈಹಿಕ ಶಿಕ್ಷಣ ಪರಿವೀಕ್ಷಣಾಧಿಕಾರಿ ಅರುಣ್ ಕುಮಾರ್ ಶೆಟ್ಟಿ, ಸ.ಹಿ,ಪ್ರಾ. ಶಾಲೆ ತಲ್ಲೂರು ಶಾಲೆಯ ಮುಖ್ಯ ಶಿಕ್ಷಕರಾದ ಶ್ರೀಮತಿ ರತ್ನಾ ಪೂಜಾರಿ, ಮಂಜುನಾಥ್ ಶೆಟ್ಟಿ ಹಾಗೂ ದೈಹಿಕ ಶಿಕ್ಷಕರಾದ ರವಿ ಶೆಟ್ಟಿ ಹಾಗೂ ಜಯರಾಣಿ ಶಾಲೆಯ ಮುಖ್ಯ ಶಿಕ್ಷಕರಾದ ಸಿಸ್ಟರ್ ಅಖಿಲಾ ತೆರೇಸಾ ಉಪಸ್ಥಿತರಿದ್ದರು.

ಪಂದ್ಯಾಟದಲ್ಲಿ ಸ.ಹಿ.ಪ್ರಾ. ಶಾಲೆ ಮೊವಾಡಿ, ಸ.ಹಿ.ಪ್ರಾ. ಶಾಲೆ ಆವರ್ಸೆ, ಸರಕಾರಿ ಪ್ರೌಢ ಶಾಲೆ ಕುಚ್ಚೂರು, ಸ.ಹಿ.ಪ್ರಾ. ಶಾಲೆ ಬೀಜಾಡಿ ಪಡು, ಎಮ್ ಡಿ ಆರ್ ಎಸ್ ಪಟ್ಲ, ಶ್ರೀ ಕೆ ಎಸ್ ಎಸ್ ಸರಕಾರಿ ಪ್ರೌಢಶಾಲೆ ಹಕ್ಲಾಡಿ, ಕೆ ಪಿ ಎಸ್ ಮಣೂರು ಹಾಗೂ ಸ.ಹಿ.ಪ್ರಾ. ಶಾಲೆ ಬಡಾಕೆರೆ ಹಂಗಳೂರು, ತಂಡಗಳು ಭಾಗವಹಿಸಿ ತೀವ್ರ ಪೈಪೋಟಿ ನಡೆಸಿದವು.

ಪಂದ್ಯಾಟದ ಫಲಿತಾಂಶ:
ಬಾಲಕರ ವಿಭಾಗ: ಸರ್ಕಾರಿ ಪ್ರೌಢ ಶಾಲೆ ಕುಚ್ಚೂರು ಪ್ರಥಮ ಸ್ಥಾನ ಗಳಿಸಿದರೆ, ಕೆ.ಪಿ.ಎಸ್ ಮಣೂರು ತಂಡ ದ್ವಿತೀಯ ಸ್ಥಾನ ಪಡೆಯಿತು.

ಬಾಲಕಿಯರ ವಿಭಾಗ: ಸ.ಹಿ.ಪ್ರಾ. ಶಾಲೆ ಆವರ್ಸೆ ಪ್ರಥಮ ಸ್ಥಾನ ಪಡೆದುಕೊಂಡರೆ, ಸ.ಹಿ.ಪ್ರಾ. ಶಾಲೆ ಮೊವಾಡಿ ದ್ವಿತೀಯ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತು.

ಕಾರ್ಯಕ್ರಮವನ್ನು ಶ್ರೀಮತಿ ಸಂಧ್ಯಾ ರಾಣಿ ನಿರೂಪಿಸಿದರು , ಶ್ರೀಮತಿ ಸುಮಿತ್ರ ವಂದಿಸಿದರು.