ಕೃಷಿಕ ಮುಂಬಾರು ದಿನಕರ ಶೆಟ್ಟಿಯವರಿಗೆ ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ

ಕುಂದಾಪುರ: ಕುಂದಾಪುರ ತಾಲೂಕು ಕಾವ್ರಾಡಿ ಗ್ರಾಮ ಪಂಚಾಯತ್ ವ್ಯಾಪ್ತಿಯ ಪ್ರಗತಿಪರ ಕೃಷಿಕ ದಿನಕರ ಶೆಟ್ಟಿ ಮುಂಬಾರು ಅವರಿಗೆ 2024ನೇ ಸಾಲಿನ ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಲಭಿಸಿದೆ.

ದಿನಕರ ಶೆಟ್ಟಿಯವರು ಕೃಷಿಕ್ಷೇತ್ರದಲ್ಲಿ ಗುರುತಿಸಿಕೊಂಡಿದ್ದು ಅಡಿಕೆ, ತೆಂಗು, ತರಕಾರಿ ಕೃಷಿಯಲ್ಲಿ ತೊಡಗಿಸಿಕೊಂಡಿದ್ದಾರೆ. ನರ್ಸರಿ ಉದ್ಯಮದಲ್ಲೂ ಕೂಡಾ ಹೆಸರು ಮಾಡಿದ್ದು ಗುಣಮಟ್ಟದ ನರ್ಸರಿ ಮೂಲಕ ಕೃಷಿಕರಿಗೆ ಉತ್ತಮ ಗುಣಮಟ್ಟದ ತೆಂಗು, ಅಡಿಕೆ ಸಸಿಗಳನ್ನು ಒದಗಿಸುತ್ತಿದ್ದಾರೆ.

ಎರಡು ದಶಕದಿಂದ ಸಮಾಜ ಸೇವೆಯಲ್ಲಿಯೂ ತೊಡಗಿಸಿಕೊಂಡಿರುವ ಇವರು ಬಸ್ ಸಂಪರ್ಕದ ವಿಷಯದಲ್ಲಿ ನಿರಂತರ ಹೋರಾಟ ನೀಡಿದ್ದಾರೆ. ಜನಪರವಾದ ಸಾಮಾಜಿಕ ಹೋರಾಟಗಳಲ್ಲಿ ಭಾಗವಹಿಸುತ್ತಾ ಬಂದಿದ್ದಾರೆ. ಧಾರ್ಮಿಕ ಕ್ಷೇತ್ರದಲ್ಲಿಯೂ ಕೂಡಾ ತೊಡಗಿಸಿಕೊಂಡಿದ್ದಾರೆ. ಹವ್ಯಾಸಿ ಬರಹಗಾರರು ಆಗಿದ್ದಾರೆ. ಇವರ ಕೃಷಿ, ಸಮಾಜಸೇವೆಗೆ ಹಲವಾರು ಪ್ರಶಸ್ತಿ, ಸನ್ಮಾನಗಳು ಲಭಿಸಿವೆ.

ಪ್ರಪುಲ್ಲಾ ಮತ್ತು ಜಗನ್ನಾಥ ಶೆಟ್ಟಿಯವರ 5ನೇ ಪುತ್ರರಾದ ಇವರು ಶಿಕ್ಷಣದ ಬಳಿಕ ಕೃಷಿಯಲ್ಲಿ ನಿರತರಾದವರು. ಪತ್ನಿ ಅಕ್ಷತಾ ಶೆಟ್ಟಿ, ಪುತ್ರಿಯರಾದ ದೀಕ್ಷಾ, ಯೋಗಪಟು ನಿರೀಕ್ಷಾ ಅವರೊಂದಿಗೆ ಕಾವ್ರಾಡಿಯ ಮುಂಬಾರುವಿನಲ್ಲಿ ನೆಲೆಸಿದ್ದಾರೆ.